Mina ibizo lami ngu Gloria Dube ngisuka endaweni yase Tsholotsho. Ngizabhala indaba yami mayelana ngokuhlukuluzwa kwezidakamizwa kwelakithi. Thina njengabomama silohlupho esihlangana lalo kubobaba lakubomama kanye labontanga abasezingeni lokukhula. Amajaha labontanga bakhathesi babhema imbanje, abanye bayanatha umuthi wokukhwehlela besuke bedlulise izinga udokotela othi unathe lona. Abanye ontanga basuke banathiswe kumbe bebhenyiswe ngabanye abangane, umntwana acine esezithanda izidakamizwa.
Abanye ontanga bacina sebedelela abazali babo lezakhamizi, abanye bona basuke babambe abantu bebathathela imali, bebamba omama iganyavu. Ikakhulu ma uhlala lobaba osebenzisa izidakamizwa, uyathi ma engena endlini edakiwe uyakutshaya noma ungayenzanga lutho, ucine ususwela inhlonipho kumyeni wakho. Abanye obaba bayatshayana bacine sebebulalana.
Labomama bayazisebenzisa izidakamizwa, umuntu ecine engasazazi ehamba sezihlambalaza emphakathini. Nxa umama esethe wenza njalo obaba sebezenzela umathanda emzimbeni wakhe. Njalo ungumama udakwa abantwana bakho bayabe bengasakuhloniphi, ekhaya kuyabe sekungasela nhlonipho. Ngoba awukwazi ukukhuza umntwana nxa eseke wakubona lawe uzilahlile udakiwe ukhuluma izinto ezihloniphisayo ngoba izidakamizwa lezi zisiphatha ngendlela ezehlukeneyo. Thina njengabomama abancane kuyasihlukumeza ngoba nxa abadala bethu labantwana sebesebenzisa izidakamizwa emphakathini kucina kungasela sithunzi. Mina ngiyafisa ukuthi ngabe abantu bayayekela izidakamizwa.
WRITTEN BY GLORIA DUBE